Haqqımızda

 

1991-ci ildə əsası qoyulmuş Azərbaycanın ilk özəl ali təhsil müəssisələrindən biri olan Qərb Universiteti fəaliyyət göstərdiyi ötən illər ərzində ölkənin aparıcı ali təhsil ocaqlarından birinə çevrilib. Universitet akademik çevrədə böyük nüfuza malikdir və bakalavr pilləsi ilə yanaşı magistr və doktorantura səviyyəsində də çoxspektrli tədris proqramı təqdim edir.

Hazırda Qərb Universiteti 50-yə yaxın ixtisas üzrə 1500-dən çox tələbəyə əyani və qiyabi təhsil proqramlarına əsaslanan təhsil verir.

Universitet 1992-ci ildən UNESCO nəzdindəki Beynəlxalq Universitetlər Assosiasiyasının, 1996-cı ildən İdarəçiliyin İnkişafı üzrə Avropa Fondunun, 1999-cu ildən Qara Dəniz Ölkələri Universitetlər Şəbəkəsinin, 2001-ci ildən Beynəlxalq İnzibati Elmlər İnstitutunun və "Atlas” Beynəlxalq Turizm Assosasiyasının üzvüdür və dünyanın bir çox nüfuzlu təhsil müəssisələri ilə sıx əməkdaşlıq edir.

Təhsil və akademik sahədəki nailiyyətlərinə görə bu təhsil ocağı dəfələrlə "Uğur” Diplomu ilə mükafatlandırılıb.

Qərb Universiteti "Siyasi Elmlər və Beynəlxalq Münasibətlər”, "Dövlət və bələdiyyə idarəetməsi”, "Sənayenin təşkili və idarəolunması”, "Regionşünaslıq”, "Biznesin idarə olunması”, "İqtisadiyyat”, "Qərb Dilləri”, "Kompyuter Elmləri və texnologiya”, "Mexanika mühəndisliyi”, "Elektronika”, "Telekommunikasiya və radiotexnika mühəndisliyi”, "Ekologiya mühəndisliyi”, "Menecment”, "Turizm və otelçilik”, "Dizayn” və s. ixtisaslar üzrə bakalavr hazırlığı həyata keçirir.

Qərb Universiteti eyni zamanda aşağıdakı istiqamətlər üzrə Fəlsəfə Doktoru dərəcəsi üçün nəzərdə tutulan proqramları təklif edir:

"Dünya İqtisadiyyatı”, "Sistemli analiz və informasiyanın işlənməsi”, "Daxili Fiskal siyasət və dövlət maliyyəsi”, "Dünya iqtisadiyyatı”, "Sahə iqtisadiyyatı”, "German dilləri”, "Dünya ədəbiyyatı”, "Texniki Estetika və Dizayn”, "Beynəlxalq münasibətlər”.

Universitet elmi tədqiqatı ardıcıl olaraq təşviq edir, burada 3 tədqiqat institutu – Gender Araşdırmaları Mərkəzi, Davamlı İnsan İnkişafı İnstitutu və Dağ Mədəniyyətləri və landşaftları Tədqiqat İnstitutu - elmi araşdırma fəaliyyəti ilə məşğuldur.

Bu günə qədər Universitet çoxlu sayda beynəlxalq layihələrdə iştirak edib və akademik proqramlarını təkmilləşdirib.

Yerli mütəxəssislərlə yanaşı ABŞ, Kanada, Böyük Britaniya, Fransa, Almaniya, Niderland və digər ölkələrdən olan mütəxəssislər mütəmadi olaraq universitetə təlimlər və mühazirələr üçün dəvət olunur.

Xaricdə təhsil layihəsi qısa və uzunmüddətli dövrdə xaricdə təhsil proqramlarında iştirak etmək imkanı yaradır. Hazırda Erasmus plyus mübadilə layihəsi çərçivəsində universitetin tələbələri Çexiya, Polşa, Latviya, Rumıniya, Türkiyə, Irlandiya kimi ölkələrin aparıcı universitetlərində təhsil ala bilərlər.

Eyni zamanda "Qərb” Universiteti Böyük Britaniyanın "Koventri” və bu ölkənin Sinqapurda yerləşən "London Biznes və Maliyyə Məktəbi”, İsveçrənin UBİS və Çexiyanın NEWTON Universitetləri ilə ikili diplom layihələrini həyata keçirir.

Tələbələrin Avropa, ABŞ və dünyanın başqa ölkələrinin universitetləri, eləcə də kollec və özəl məktəblərdə təhsil almaq imkanları var.

 

Əməkdaşlıqların siyahısı

 

Universitetin zəngin elmi kitabxanası da tələbələrin ixtiyarındadır.

Hazırda Universitetin kitabxanası 50.000-dən çox ədəbiyyat, 500-dən çox mikroforma və informasiyanın başqa mənbələri ilə ölkədə ən zəngin kitabxanalardan biridir. Kitabxana Fondunda ingilis dilində 15 000-dən çox ədəbiyyat mövcuddur.

Qərb Universitetində BMT-nin Sosial İnkişaf üçün Tədqiqat İnstitutunun (UNRISD), BMT-nin Ümumdünya Turizm Təşkilatının, Ümumdünya Əqli Mülkiyyət Təşkilatının və Beynəlxalq Əmək Təşkilatının Depozitariya Kitabxanaları yaradılıb. Hazırda onlarla nüfuzlu beynəlxalq təşkilatdan kitabxana fonduna ədəbiyyatlar daxil olur.

Qərb Universitetində Universitetin Əməkdar Professoru, məşhur tədqiqatçı arxeoloq, multi-dissiplinar və multi-kulturalist Tur Heyerdala həsr olunmuş xüsusi sərgi mərkəzi var. Universitet T.Heyerdala həsr olunmuş iki kitabı yenidən nəşr etdirib və silsilə tədqiqatlar həyata keçirib.

Qərb Universiteti ictimai, elmi və idman layihələrinin təşəbbüskarı, təşkilatçısı və fəal iştirakçısı kimi çıxış edir. Bu günə qədər uğurla həyata keçirilmiş 1-ci Azərbaycan – Antarktika ekspedisiyası, Azərbaycan – Afrika ekspedisiyası, Azərbaycan – Akonkaqua ekspedisiyası, çoxlu sayda Azərbaycan Hava və Ekstremal İdman Növləri Federasiyasının layihələri, eləcə də 2013-2014-cü illərdə Bakıda keçirilmiş Dünya kuboku üzrə İdman dırmanması növü üçün universitetin verdiyi dəstək xüsusilə vurğulana bilər.

Qərb Universitetinin müasir təchizatı, laboratoriyaları, şəffaf və obyektiv qiymətləndirmə sistemi, açıq rəqabət siyasəti, Karyera İnkişaf Mərkəzinin tələbələrin karyera perspektivlərini yüksəltmək üçün dövlət, özəl, beynəlxalq və ictimai təşkilatlarla əməkdaşlığı, şübhəsiz ki, tələbələri stimullaşdırır.

Beləliklə, Qərb Universitetində təşkil olunan məzun proqramlarının əsas məqsədi tələbələrdə biznes, idarəçilik və digər istiqamətlər üzrə peşəkar mütəxəssis və liderlik keyfiyyətlərini formalaşdırmaqdır.


 


HİMN